12‏/10‏/2008

حلم الـبـنـية .... والــجدع


يستنى صوت الشمس لما يعلنه
عصفور وساكن من زمان شجر الزتون
يفرد دراعاتة الصغار عالدنيا يحضنها
ويردد العصفور نشيد الكون :
" الصبح خد إفراج من تهمة الضلمة "
" والليل هرب فـ سكون واتغمت العتمة "
تفرح عنين صاحيين مـ الفجر منتظرة
والدقة جواه ترتجف مـ النشوة والبشرى
ضي النهار ساند على الشباك بكل ثبات
ده الصبح صبَّح عالغلام
ابن الخمس سنوات
************************
كانت تملى تشتكيه امه لابوه
إبنك شقي .!!
إبنك لعوب .!!

ومتـزَّعم عيال الحيْ
يطمنها الجدع بشويش
يقول ده وحيد
متظلمهوش
تزوم شفايفها وتمتم كما الدراويش
ماعـادش حدانــا غيره حـيْ
فيتـنهد
ويتذكر
ويترحم على الأموات
فتتخض البنية زيادة
ويموت الحديت لسكات
************************
مـ الفجر كان صاحي الصبي
بتلف جواه دنيتة مع عقرب الساعة الطويل
مـ الفجر ولحد الجرس
اليوم طابور المدرسة هيكون محاوطينه الحرس
اليوم صباحة مختلف
غنوة عصافير الزتون متغيره
ساحب وراه سرب العيال مـ الحي مجتمعين
الواد شقي
الواد لعوب
، وكلنا عارفين
وأديله حبة مـ السنين فـي لعبته بارع
وقبل سور المدرسة
قايض كتـابه والعيال بحجـارة الشارع
والتفوا وبخفة وبشقاوة يحاوطوا طوابير الحرس
وصرخ فـ وش الجند فجأة
لـمَّا لجِّمها الخَرس :
" الله أكبر "
وانتشى فـ إديه غبار أول حجر
**********************
الحلم كان صافي النوايا
مش تجبُّر أو طمع
حلم الخلايق كلها
من سيدنا آدم وانت طالع
لمَّـا تمزيق البنية توبها على صِدر الجدع
بس الجدع كان منتشي ..
ابن الخمس سنوات بالمريلة
وكتابه ، كان بيشن غارة !! ..
الواد حقيقي
كان شقي
وكان لعوب
لكنه فعلا
حقق الحلم
بجدارة ..
دمعة أبوه مـ الفرح كـانت مش قليلة ..
الحلم أكبر من مجرد ضحك عيل مـ العيال
الحلم عيشة مهيش ذليلة ..
الحلم إحساس بالونس
على أرض خضرا وبيت وشجره
وجار سهامه
تؤتمن ..
وبرغم ان الواد ده يمكن
كان قصير القامة جداً
لاجل ما يطول
الكفن ..
وبرغم انه كان يدوب بيـحبي قلمه عالكراس ..
وضروري تتكعبل على لسانه الحروف
فـ الكلمة لو قالها
بحماس ..
وبرغم إنه لسه مانتسبش لفتح ولا يعرف حماس ..
حدف الحجر من إيده وبصدره بفرح
لقف الرصاص مـ
البندقية ..
وسقت دماه بذره لأحلام كام جدع
مع كام
بنية ..
أما اختزل حدوتة الستين سنة
فـ خمسة صوابعـه المحضونين فيها الـحجر
واتبسطت بيها
القضية ..
وثبت لكل الناس بإنه
كان شقي
وكان لعوب
وكان فلسطيني الهوية ..

هناك 89 تعليقًا:

أحمد سلامــة يقول...

على الهامش :
----------
" لماذا ينبغي للعرب التوصل الى السلام ؟ لو قدر لي أن اكون زعيما عربيا لما تصالحت مع اسرائيل على الاطلاق .
هذا امر طبيعي .. نحن قد استولينا على بلادهم . وهم لا يعنيهم في شي ان الله وعدنا بها لان دينهم غير ديننا .
لقد كانت هناك معاداة للسامية ومعسكرات اعتقال نازية ، ولكن ذلك ليس ذنبهم .. هم لا يرون إلا شيئا واحدا هو اننا جئنا الى هنا وسرقنا بلادهم ، فلماذا ينبغى عليهم قبول هذه الحقيقة .. "
" ديفيد بن جورين " مؤسس إسرائيل

شق القمر يقول...

الله يا أحمد
بجد يسلم عقلك اللى احتوى الفكره الجميله دى
وتسلم الكلمات اللى صوغها فكرك عشان تدينا الاحساس دا
والله ردى هذا من نبع احساس رجفنى فى وسط الكلام
مش هحدد زى ما كنت ناوية احلى جزئيه
لانى لو مكنتش استحليتها مكنتش كملتها
فشكرا جزيلا لك

أسير حبيبتي يقول...

السلام عليكم

و الله يا احمد مش عارف اقولك ايه
الكلمات جميلة جدا
و الموضوع موجع و محزن جدا

بس التنويه اللي انت حاطه ده اول مرة اسمع عنه

كويس انهم بيعترفوا بكده
و الشئ المؤسف جدا جدا انها جت منهم و مجاتش مننا

ذكرتني اوي بقصيدة لا تصالح للعظيم امل دنقل

تحياتي لك
و تقديري الشديد لقلمك

ـ-ـ- أحمد عبد العدل-ـ-ـ يقول...

كنت أتمنى أن أكون كاتباً بالفعل لأعبر عن مرارة إحساسى .. لا أدرى بين الأبيات ومنذ بدايتها لماذا شعرت أنه سيموت ..ربما لأننا اعتدنا النهايات المؤلمة لأحلامنا الرقيقة
نحن نصر على السلام (عفواً، هم يصرون) لأنهم يبحثون عن الحل وقد ثبت أننا ينبغى أن نبحث عن الحق وليذهب الحل إلى الجحيم إن كان بهذا الشكل فالموت أهون من حياة مغموسة فى كل هذا الذل و العار
مهما تكلمت لن تسعفنى كلماتى لعرض رأيى فكيف لى أن أكتب صمتاً متوجعاً
تحياتى ودمتم (أنتم و أنتم ) بكل خير

norahaty يقول...

السلام عليكم ورحمة الله وبركاته
تكلمت انت بلسان
فلسطينيى الارض المحتلة
من يعانون ويقاسون
ويتألمون ولا ييآسون
ابدآ لا ييآسون
مهما وقف الحرس
ومهما عارضهم الاهل
ومهما قالت ونهت امه
..............
لا اعرف تنوع الصنوف
من قصيدة وشعر ونثر
وخلافة ولكن ما اعرفه أنى
احببت ما كُتب ورحت اقرأ
وكأنى اشاهده كشريط سينمائى.
تحياتى الكثيرة.

محمد سلامة يقول...

أزيك يا صديقي
أول تلات مقاطع كانوا موفقين الى حد كبير و مليانين بشغل محترم بجد لكن المقطع الأخير كان فيه بعض الترهل أو التطويل اللي أضر شوية بالمقطع
السطر اللي بيقول
فـ خمسة صوابعـه المحضونين بيها الـحجر
فكرة الصورة جميلة بس التركيبة اللغوية حتى في العامية أعتقد أنها مش سليمة أنت قصدك تقول في خمسة صوابعه المحضونين بالحجر أو اللي حاضنين الحجر
و أخيرا الوزن يا صديقي في كسور كتيره في الوزن
لكن في نفس الوقت في شغل كتير حلو و خصوصا في المقاطع الأولى
أنت حقيقي شاعر محترم

habiba يقول...

السلام عليكم
ازيك يادكتور احمد
مش عارفه ليه جالى احساس وانا بقرا كلامك انى بفتكر الجاهينيات
حسيت بشبه كبير ومش عارفه ليه
يمكن انا ماليش فى الشعر ونقده
لكن اللى اقدر اقولهولك احساسى باختلافك واسلوب تعبيرك عن الكلام

بخصوص الكومنت اللى نشرته عالهامش كان نفسى اقول حاجه واحده بس هو مش مفروض نتكسف من سلبيتنا ولا ايه؟؟؟!!!!!!

الراجل بيعلنها اللى بيفهم يعمل كذا واحنا ........يااسفا

تحياتى يااحمد
دمت بكل خير

قلب مصرى يقول...

بجد القصيدة جميلة جداً
ورغم إن الطفل (الراجل) مات فى الآخر إلا إنك تحس بفرحة مش تزعل عليه.

حمامة يقول...

لو قدر لي أن اكون زعيما عربيا لما تصالحت مع اسرائيل على الاطلاق


لماذا ينبغى عليهم قبول هذه الحقيقة ؟


سبحان الله ده كلامهم هما
امال فين كلامنا احنا
تعرف ساعات بنسكت ضمايرنا ونقول ماهما اللى باعوا ارضهم
اذكر ف رواية تقريباً شرق النخيل لبهاء طاهر ولحد ما قراتها انا كمان كنت بقول كده
فيها بطل الرواية كان بيذل زميله الفلسطيني بالجملة دى وانهم باعوا ارضهم وهو كان بيسكت لان فيها نوع من الحقيقة
لحد ما قاله صحيح ده حصل بس اللى عمل كده جدودنا واحنا ملناش دنب ف اللى عملوه ولا ف اللى بيحصلنا ( فيما معناه ) ..

فكرتنى بمقولة لهتلر بيقول فيها على ما اتذكر ..
لقد قتلت اليهود بقسوة وتركت بعضاً منهم ليرى العالم اننى كنت على حق ..

ماشاء الله عليك بجد اسلوبك هايل
اتمنى نشوفلك كتاب قريب :)

عبدالحي .. الحياة أبسط من كدة يقول...

الديفيديهاية جاهزة يا دكتووووووووووووور

مش هقولك عليها أيه عشان السصبنس

sendrlla يقول...


اول تعليق مش ممكن فين جمهورك يا احمد
اولا عوده كريما
ثانيا بتختفى تختفى وترجع ببوست اقوى من اللى قبله
البوست طبعا مش محتاج تعليق هو معلق على نفسه
بس بجد انت تخاف على نفسك شويه اصل كده ماينفعش خالص
........................
سندريلا

حسن ارابيسك يقول...

أبوحميد
مساء الخير
أولاً مايكتبش الكلام ده غير أحمد سلامة
ألاحظ دائما عندما تكتب تكتب بجد لأنك عاوز تقول حاجه وجواك حاجات عاوزه تطلع ولما بتطلع بتطلع صح بأسلوب أحمد سلامه اللي اتعودنا عليه..حقيقي مش مجاملة ولامبالغة انت من الناس اللي ليها شكل خاص بها في كتابتها..احييك عليه
بأمانة ملحمتك الطازجة التدوين مليئة بصور لم تأتي عابرة ومصادفة بل جاءت بالفعل عن تعبير صادق وقوي يواكب الحدث بل أحيانا ينبثق من ذات الحدث والغريب والمحزن اننا نلاقي شغل جميل زي ده لقضية زي دي وناسها للأسف كل يوم بيضيعوها أكتر واكتر ناسها للأسف ضربوا بعرض الحائط كل ما قام به الجدع حرقوا كل الصور الجميلة والمضيئة اللي كونها بجهاده وبتمدده بكفنه الصغير
تسلم بجد

ملحوظة
بخصوص تعقيبك على تعليقي السابق الخاص بتدوينة الخايب حسن واضح أنك فهمتني غلط للأسف أنا لم اقصد شيئاً سخيفاً بالعنوان بالعكس العنوان جاء جميلاً جدا جداً ولكن ما أحببت أن اخبرك به انني كاتب عن الشاطر حسن ولكن المضمون كان يندرج تحت عنوانك الخايب حسن..اعتقد انك فهمتني دلوقتي
تحياتي لشخصك الكريم
حسن أرابيسك

DoNyA يقول...

كأستمتاعي الدائم باسلوبك الرائع وحرفيتك في تجسيد الكلمات
صحبتني رعشه لا آكاد اسيطر عليها
ودمعه متحجره من هول المشهد

يالله ..........
عذرا
لن استطع المتابعه
القلم يأبي والقلب يتفتت ألما

كراكيب عادل يقول...

من ساعة ما قريت عصفور وشجرة زيتون راح بالي علي طول لفلسطين

لما واحد فتوة ياخد منك حاجة ينفع انك تستعطفة علشان يرجعلك الحجة دية

الصبح خد افراج من تهمة الضلمة والليل هرب ف سكون واتغمت العتمة

انا بجي هنا علشان اشوف الكلمات دي بالذات

اما اختزل الستين سنة في خمسة صوابع مضمومين علي حجر

دي هايلة هايلة معبرة بشكل

عازفة الأوتار يقول...

" الصبح خد إفراج من تهمة الضلمة "
" والليل هرب فـ سكون واتغمت العتمة "

بجد اسلوب رائع
انا فضلت كذا يوم ادخل و اقرا الجملتين دول بالتحديد
بس الوقت مكانش بيسعفنى انى احط تعليق

بجد عاميتك رائعة و تعبيراتك عميقة جدا

دمت بكل ود و خير

فى القلب يقول...

بجد يا أحمد كل يوم أدخل و أقرأها

مش عارفه عدد المرات ألى قريتها ولا عدد دموعى بعد قرأتها

أنا كنت حاسه أن القضيه ماتت جوانا وأصبح عندنا لا مبلاه

بس دلوقتى عرفت أن الشاطر أحمد سلامه الجدع ممكن يعمل اى حاجه

mahasen saber يقول...

الصبح خد افراج من تهمة الضلمه
..الله الله ايه الجمال ده هما كل بتوع طب ادباء وشعراء كده بالفطره ولا ايه
جميله قوى قوى يا سلامه..
بس بقه تعليق ليا على الهامش للاسف اليهود بيعترفوا بحاجات وبيقولوا امور بشجاعه احنا نحسدهم عليها يعنى عندهم مصداقيه وااقولك بقه بقول كده ليه اينشتاين عالم النسبيه كان يهودى ولما اسرائيل المنكوبه دى انشئت اول جامعه ليها حبوا يكرموه ويجيبوه على الوطن المحتل وده طبعا لانه عالم كبير ويفخروا بكونه يهودى تخيل بقه برغم كل الاغرائات الماديه والاجتماعيه رفض اينشتاين اليهودى وقال انه مينفعش يعيش فى وطن مش بتاعه وان الرب اراد ليهم الشتات لعصيانهم يه فلازم يتقبلوا وينفذوا عقاب الرب...
تخيل واحد يهودى بيرفض اغراءات وعنده كم مصداقيه وشجاعه انه يقول كده
...احنا بقه تفتكر عندنا اصلا مصداقيه ده كلمة شجاعه قربت تتلغى من قاموسنا..

mahasen saber يقول...

بس نورتنى يا سلامه فى المدونه وصحصحتها بالبن بتاعك ....
وبجد بجد مدونتك راقيه جدا انتا ورامى فعلافعلا مدونات عباقره اما الجوهرى ده فاتنبأله انه هيبكا كاتب كوميدى ناجح مش دكتور ..

محمد الجرايحى يقول...

أخى الفاضل: أحمد
السلام عليكم ورحمة الله وبركاته
مدونتك شيك وتدل على ماتملكه من حس فنى رفيع ..
وكلماتك معبرة عن أحاسيس تخرج من القلب بدون تجميل ..تحمل معها صدق الشعور

تقبل تقديرى واحترامى
أخوك
محمد

dandana يقول...

جميلة...

كنت خايفة النهاية تطلع اقل من كدا...

ومع انها طبيعية بس صدمتنى
الصدمة اللى هى تفوق..كأن حد بيهزك جامد

Medicine Break يقول...

شرفت بلقائك فى لقاء المدونين
بالمناسبة قريت الكتابين.. هايلين
وبالنسبة للبوست .. ماشاء الله .. موهبه كبيرة

mamato2010 يقول...

السلام عليكم
الله يفتح عليك.
وأنا كمان مستنيك تقرا موضوعى الجديد.أنا عارف أنه خم بس أتمنى أنك تقراه و تقوللى رأيك

تخاريف خاصه! يقول...

الحلم أكبر من مجرد ضحك عيل مـ العيال
الحلم عيشة مهيش ذليلة ..
الحلم إحساس بالونس
على أرض خضرا وبيت وشجره
وجار سهامه تؤتمن ..



حلوة اوى يا دكتور..
اسلوبك فعلا ماشاء الله...
تسلم ايديك...

camera_girl يقول...

خطيييييييييييييييييرررررررررره

ياااااااااااااااااه انا فاتنى كتير فعلاا كل وقت اتأخرت عن قراية البوست ده جميله يا احمد حلوه بجد هقراها تانى بسيطه وجميله وخطيره الكوت الى كاتبها فالكومنت دى مستغربه جدا ان ده كلاام مؤسس اسرائيل!!!!

اقصوصه يقول...

الحمدلله

قبلناها

وبلعناها خلاص

وشربنا ماي من وراها

\عشان سهولة البلع!!

حزيــــــــــــــــــن يقول...

عندما ادلف بين السطور فى مدونتك لا اتخيلك كما اراك
لك مزاج خاص يجعلك قادر على تشكيل حلم للبنية والجدع
فى بداية قرائتى تخيلت انك تتحدث عن اسرة مصرية بسيطه فى صعيد مصر لم افهم لماذا هو الوحيد الحى ولماذا مات الاخرون ... لقد كان حقا شقى ولعوب ويبدو ان اخوته ايضا كانوا كذلك

mahasen saber يقول...

يا مالك المدونه ..يا مالك المدونه
انا كنت سايبه تعليق راح فين يا مالك
...انا بحزر لو تعليقى مظهرش ومعاه رد عليه انا هسحب منك ملكية المدونه
.........
وقد قولت ما عندى زى رامى كده...

MONDAHESH يقول...

كعادتك

ابداع نرفع له القبعة

واسلوب دائما متميز يستحق كل التقدير والاحترام

على فكرة اول مرة اشوف مقولة "ديفيد بن جورين" لكن أثرت فيا جامد

تحياتي

Bongo يقول...

جميلة جدااااا بجد
و اجمل ما فيها أفكارها الجديدة اللي بجد عرضتها بجدارة

ما شاء الله بجد تححححفة
ربنا يبارك لك في موهبتك و استمرررررررر

only spot يقول...

وااهى دى كانت بدايه لقصص يوميه لاظفال عزل بترمى بحجاره عدو عشان يرشق رصاصه فى صدروها وامهات وشيوخ ورجاله بيموتو بدون تمن وفى النهايه يلاقو العدو امامهم والخلاف الى بين فتح وحماس من خلفهمواهى لعبه وكلنا بنلعب فيها


على الهامش
الطريف انهم بيقنعو العالم اننا معادين للساميه الى هى حسب القاموس الامريكى تعنى الصهيونيه طب امال تعريف الساميه الى فى المعجم العربي الاساسي ده ايه؟" فإن الساميين هم "مجموعة من الشعوب ترجع في أصولها إلى سام بن نوح وتضم العرب والاكايين والاشوريين والبابليين والكنعانيين والفنيقيين والعبرانيين"..ولا هو ده شر البليه الى برضه يبكى وميضحكش

دمت بالف خير وتسلم ايدك على البوست

R.R يقول...

الصديق العزيز ايه اخبارك انا جيت اسلم واطمن قريت العناوين الكتير اللى فاتتنى ولك منى باذن الله قراءه بتأنى لكى استفيد من ابداعاتك الدائمه
لك منى كل تحيه يا أحمد

R.R يقول...

اه بالمناسبه هو فين أبو ضحى أنا دخلت من فتره ملقتش البلوج بتاعه .لو عرفت توصله بلغه سلامى الشديد وخليه يرجع للتدوين
يلا تحياتى لكما

R.R يقول...

الله يا احمد جميل واحساسك عالى اوى فيه
ما شاء الله عليك
يارب دايما للامام وانت لازم تنضم لجماعه ادبيه ان مكنتش يعنى منضم
الف تحيه ليك ولقلمك المرهف بالمعانى والاحاسيس

Mahmoud farag يقول...

تجسيدك للقضية في سطور صغيرة .. رائع جدا ..

ويارب الخمس صوابع تبقى إيدين كل العرب متشبكة مع بعضها ... الاتحاد قوة
وربنا يرحمنا جميعا

و عجبني قوي الجزء الاخير

أما اختزل حدوتة الستين سنة
فـ خمسة صوابعـه المحضونين فيها الـحجر
واتبسطت بيها القضية ..
وثبت لكل الناس بإنه
كان شقي
وكان لعوب
وكان فلسطيني الهوية ..

يا مراكبي يقول...

تصفيق حاد مش عارف للمرة الكام

حقيقي جميلة .. وفيها عيب واحد بس

العنوان مصري شعبي مش ماشي مع الموضوع الفلسطيني الهوية

moony يقول...

"الحلم أكبر من مجرد ضحك عيل مـ العيال
الحلم عيشة مهيش ذليلة ..
الحلم إحساس بالونس
على أرض خضرا وبيت وشجره
وجار سهامه تؤتمن .."

عندك حق.. بس ياااااه ع الوجع لما يبقوا اطفالنا الضحية ,
ويشيلوا عننا حمل القضية..
ويدورا هما يهتفوا باللى الكبار نسيوه
ياااه ع الخجل لما العيال يبقوا ارجل واصدق واخلص مننا.

"بتلف جواه دنيتة مع عقرب الساعة الطويل"جديد كعادة اسلوبك.

"وسقت دماه بذره لأحلام كام جدع
مع كام بنية .."ياااه رائع

"فـ خمسة صوابعـه المحضونين فيها الـحجر"
حسيت انى شايفة الولد بجد.
كويس ان لسه فى حد بيفتكر فلسطين.. ويكتب عشانهم.
تحياتى وبالتوفيق دائما.

Hannoda يقول...

الصبح خد إفراج من تهمة الضلمة "
" والليل هرب فـ سكون واتغمت العتمة
-------------
مش تجبُّر أو طمع
حلم الخلايق كلها
من سيدنا آدم وانت طالع
-----------------
الحلم عيشة مهيش ذليلة ..
الحلم إحساس بالونس
على أرض خضرا وبيت وشجره
--------------

ماتسألنيش ليه أخدت السطور ده بالذات

كل اللي أعرفه انهم شدوني و هزوني

كمان اسلوب السرد و الكلمات اللي انت مختارها رائعة جدا

بوست رائع بكل المقاييس انا مبهورة بيه
بفكرته
مصطلحاته وتعبيراته
زي
الجدع و البنية

عنوانه

كمان الكلمات اللي عاى الهامش ليه ما تحطهاش في البوست نفسه في نهايته؟


فعلا... يمكن حلم تحرر فلسطين بدأنا نياس منه و ده حقيقة باينه فشوعبنا كلنا

عمري ما بشوف في عين عربي احسا بان فلسطين راجعة

بس ده مش معناه الذل

الحياه حتى لو حاتخلص من غير ما تنول حلمها برضه لازم تدور عليه و تدافع عنه
حتى لو مش جاي

أصفق بشدة و احترام بااااالغ

Hannoda يقول...

أنا حطيت تعليق طويل جدا هنا من يومين
!!!!

يا اما الجهاز ده مش مطلع التعليقات

يا اما الجهاز اللي كنت عليه من يومين ما حفظش تعليقي

أنا متغاظة جدا لإن البوست تحفة و صعب أقول اللي قلته تاني

ده أنا من اعجابي بيه حطيته عندي على السايد بار

أكييييد التعليق مش موجود؟؟
آه ياني
:(

أميرة ويلز يقول...

حلوة اوي يااحمد بجد وحشتني مدونتك

عاجباني اوي الهوامش عندك انا دخلت اتفرج عليها وسيبت البوست

هيثم الكاشف يقول...

اللللللللللللللللللللللللللللللللللللللللللللللللللله بجد تحفه و الله جميله جدا و خصوصا النهايه :)
من أجمل ما قرأت بصراحه

DoNyA يقول...

عل مانع التأخير خيرا
اشتقنا لقلمك الراقي

عازف الناى الحزين يقول...

فـ خمسة صوابعـه المحضونين فيها الـحجر
واتبسطت بيها القضية ..
وثبت لكل الناس بإنه
كان شقي
وكان لعوب
وكان فلسطيني الهوية ..

رائع بجد
مش عارف اقولك ايه أكتر من اللى انت قلته فى القصيدة بجد
شكرا لامتاعنا بهذه الروائع بجد

م/ الحسيني لزومي يقول...

شارك في الحملة الشعبية للقيد بالجداول الانتخابية وادعو غيرك
ضع بنر الحملة علي مدونتك
البنر موجود علي مدونتي
من يرغب في وضع البنر يرسل لي ميله كي ارسل له الكود

م/ الحسيني لزومي يقول...

من اجل مصر
شارك في الحملة الشعبية للقيد بالجداول الانتخابية وادعو غيرك
ضع بنر الحملة علي مدونتك
البنر موجود علي مدونتي
ارسل ميلك اذا كنت ترغب في وضع البنر نرسل لك كود البنر

حاجات عيال يقول...

انا يهمني الشعر
القصيدة رائعة
لكنى لا أحب كثر الهتافات
ومع ذلك سوف أهتف أني أحببت شعرك

تحياتي

dew_bright يقول...

جميله

عميقه

مؤثرة

وكالعاده متميزة

R.R يقول...

اين ذهبت يا رجل
ارجو ان تكون بخير

أحمد سلامــة يقول...

شق القمر :

إطراء ومجاملات لا اجد لها سوى اشكرك بشدة
اتمنى ان استحقها يوما ما
الشكر لك لتشريفك المدونة والتعلق
:)

أحمد سلامــة يقول...

اسير حبيبتي :

وحشتني جدا يا هيثم
فيييينك
ولا فيني
الله اعلم
انا مختفي ليا اكتر من شهرين اهو
معرفش حاجة عن اي حاجة
وحشتوني ووحشتني البورصة قوي
:)
متزعلش مني عشان مبجيش كتير مدونتك
انت على بالي دايما والله
وشكرا ليك على تنويرك ليا
:)

أحمد سلامــة يقول...

احمد عبد العدل :
بالفعل هم
هم هم ودائما هنالك هم في كل وقت وزمن
ونحن هربت وولت
ولا أعلم اين
يعلم الله وحده اين ومتى يعود الحق لدورته الطبيعية
الله وحده
شرفتني وانرتني يا صديقي

أحمد سلامــة يقول...

norahaty :

اشكرك بشدة
اتمنى ان يصلك ما كتبت فعلا
هذا ابلغ من الاعجاب بكثير
تحيتي لك ولزيارتك الجميلة
:)

أحمد سلامــة يقول...

محمد - بك - سلامـة :

وحشتني اولا
ثانيا شاعر ومحترم دي كتيرة قوي
بالذات شاعر :)
الله يكرمك انت بترفع من روحي المعدنية جدا بالذات دلتا
انا صلحت الكلمة طبعا وخليتها " فيها "
ابقو ركزو وانتو بتكتبو بقى متقرفوناش
:)
نورتني يا محمد والله ما تعرف بفرح بتعليقك اد ايه
ان شالله الجاي يكون احسن شوية عن كدة

أحمد سلامــة يقول...

حبيبـة :

والله يا نور انا نفسي نفسي يكون في شوية دم
من الاتنين
اد ايه كلامه مستفز
واد ايه سكوتنا مستفز

شكرا ليكي ولزيارتك
منوراني دايما

أحمد سلامــة يقول...

قلب مصري :

ميرسي ليك
اكيد هي حاجة تفرح
بس الحاجة الكبيرة هتفضل تزعل بردو على طول
مسير الحق يبان
ستين سنة مش مدة بردو

نورتني بزياراتك وسعيد بمتابعاتك للمدونة
شيء يشرفني

أحمد سلامــة يقول...

حمامة :
بردو المشكلة ابعادها بقت اكبر من مين باع وليه وامتى
الموضوع بقى مجازر بحتى
هو يريد قتلى ليس اكثر ولا اقل
الموضوع لا يحتاج للتعقيد
وكذلك الحل

ميرسي ليكي يا حمامة بتنوريني في المدونة دايما

أحمد سلامــة يقول...

عبـ حي باشا ملك البوغاشا :

حاضر يا فاندم
انا كللي صاصبينس
اهرب من اي مادة ولا اشيلها حتى واجي
ابقى اسال علينا يا عمنا
:)

أحمد سلامــة يقول...

سندريلا :

خلاص بقى راحت علينا يا سندريلا
:)
ربنا يخليكي
كفاية انك من اوائل الناس اللي قرولي
:)
نورتيني يا فنانة

أحمد سلامــة يقول...

حسن - ابو علي يعني - ارابيسك - فنان اصيل يعني :

اولا نورتني بزياراتك الكريمة والمتابعة المحترمة اللي شخصي الرديء مقصر فيها
:( بس الكلية هي اللي واطية مـ الاخر يعني
بالنسبة للقصيدة دي فهي شهادة اعتز بيها واشكر اطراءك الجميل عليها واتمنى دايما نكون عند حسن الظن
بالنسبة للي فاتت انا كنت قصدي لو كنت كاتب حاجة قريبة كانت او بعيدة وليها نفس العنوان وفي سبيل النشر او كده والعنوان ده ممكن يعمل تضارب او لخبطة اغيرهولك خالص مش مشكلة يعني العناوين اد كده
ده كان قصدي بس
وانت انسان محترم وليك معزتك الخاصة يا فنان
شرفتني بشدة

أحمد سلامــة يقول...

دنيا :
وان كنت اشاركك الشعور
فلا اعلم
كيف هو الحال هناك
ولا يسعني سوى التخيل
حقيقة لا اعلم

أحمد سلامــة يقول...

كراكيب عادل :

كعادتك يا فنان
تمسك بالفنيات بين اصابعك بشدة
ولك اقول اني عشقت هاتين الصورتين فعلا بالذات
ويسعدني تشريفك الجميل دوما
:)

أحمد سلامــة يقول...

عازفة الأوتار :
يبقى ده بوست محظوظ عشان اتقرا كتير كده
انا بعز البيتين دول بردوبالذات
ولسه قايل كده في رد سابق
اتمنى القصيدة كلها توصل لنفس المستوى
واتمنى الزيارات متتقطعش
نورتيني

أحمد سلامــة يقول...

في القـلب :

والله كل يوم كنت احس بفرحة لما تدخلي تقريها
المدونة تفتقد زياراتك دايما وان كانت مستمرة
:)
وانا شاطر بيكم
مش لوحدي يعني

أحمد سلامــة يقول...

محاسن صابر :

اعتقد انك خدعتي في هذه المقولة النابعة من منطق البلطجة وحب القهر وليس شجاعة الاعتراف بالحق من بعض حيوان

هؤلاء لا يعرفون الصدق ولا يفهمون معنى الشجاعة
لكنهم يتكلمون ببلطجة الغازي والمحتل ليس اكثر
---
بالنسبة للتنوير فليس اكتر من تنويرك لاي مدونة تزوريها
:)

أحمد سلامــة يقول...

محمد الجرايحي :

شكرا لك على الوصف النادر
اول مرة اسمعه في مدونتي
:)
واشكر لك مرمرك الكريم هنا
سعدت بك

أحمد سلامــة يقول...

dandana :
ميرسي ليكي
المهم تكون وصلت
للاخر
نورتي مدونتي
تحيتي لك

أحمد سلامــة يقول...

Medicine Break :
الشرف لي ايضا
اتمنى دوام المتابعة
دمت بكل ود

أحمد سلامــة يقول...

mamato :

اوكي يا سيدي
رخم رخم
ميغلاش عليك
:)
نورتني يا صديقي

أحمد سلامــة يقول...

تخاريف خاصة :

شكرا ليكي يا دوك
اتمنى وانتظر زيارتك الجميلة دايما
نورتي المدونة

أحمد سلامــة يقول...

camera_girl :
اه يا اميرة
تخيلي ده كلامه
كده
عيني عينك
خلاص
مفيش خشا

أحمد سلامــة يقول...

أقصوصة :

مش كلنا بلعناها يا اقصوصة
مش كلنا

شرفت بازيارة

أحمد سلامــة يقول...

حزين :

يخيفني تخيلك الاخير عن الاسرة المصرية البسيطة
هل تعتقد ان مثل هذا اليوم قد يأت ؟؟
----
يسعدني ابحارك دائما

أحمد سلامــة يقول...

mahasen saber :
لا طبعا ما نقدرش
كله موجود ومسجل بعلم وصول
كان ناقص دمغة وشوية اجراءات بقى انتي عارفة الروتين

أحمد سلامــة يقول...

mondahesh :
شكرا ليك يا صديقي
وشكرا على الاطراء الجميل
اتمنى الاحساس يدوم باذن الله
ويشرفتي تشريفك هنا

أحمد سلامــة يقول...

bongo :

ميرسي ليكي
مديح واطراء اتمنى ان استحقة فعلا
شكرا لكي ولزيارتك الجميلة
تحيتي لك

أحمد سلامــة يقول...

only spot :

اساطير من البطولات بتحصل كل يوم ومحدش بيعرف عنها غير مشاهد في اخر نشرة الاخبار
الاف الشهدا الل يكانو مجرد مواطنين بسطاء واجبرهم الظلم على العيشة دي

ربنا وحده قادر يرجع الحق
والدعاء الضعيف هو ما نملكة دلوقتي

شرفت بالزيارة
وحمد الله عالسلامة

أحمد سلامــة يقول...

R.R :

ياااااااه
حمدالله عالسلامة
الف حمدالله عالسلامة
مش كنتي تقوليلي كنت كتبت البوست ده من ابريل الل يفات عشان تظهري
:)
وبعدين ايه كل ده بس خوفتيني والله انا قلت مش هترجعي تكتبي تاني
عسى المانع يكون خير ان شاء الله
ابو ضحى اخر معلوماتي عنه انه في السعودية من فترة مش قليلة
ان شاء الله اتواصل معاه وسلامك يوصله
وبجد فرحتيني قوي قوي بالزيارة دي

أحمد سلامــة يقول...

محمود فرج :

شكرا ليكك يا محمود
اتمنى تسعد بموضوعاتي دايما
وتشرفني على طول
شكرا ليك

أحمد سلامــة يقول...

يا مراكبي :

انا معاك بشدة
وفي بعض الفاظ القصيدة كمان
بس انا اعتمدت على اتجاه الحكي
ومش عارف العنوان لو بنكهة فلسطينية هيبقى مبلوع ولا مبالغ فيه ؟؟
سعيد بزيارتك بشدة

أحمد سلامــة يقول...

moony :

والله زمان
وحشتني زياراتك
في ناس كتير فاكرة القضية والله بس فعلا الكلام عنها بقى قليل مع اني مش شايف ان في قواضي غيرها ينفع نتكلم عنها
الاطفال بقو الضحية عشان هما اللي فهمو القضية بكل بساطة اما احنا فلسة

سعدت بزيارتك جداجدا

أحمد سلامــة يقول...

hannoda :
لا طبعا مفيش حاجة هنا بتضيع يا هنودة
ولو التعليق ضاع اجيبه تاني
:)
القضية متبسطة جدا اهو وده واضح في فلسفة الاطفال في تعاملهم مع القضية
اتمنى اننا ككبار نفهم ده كويس

وانتي اختارتي المقاطع المفضلة عندي كالعادة
اتمنى القضية متموتش
ولو حتى في نظرة عيونا لبعضنا كعرب

تحيتي لك ولزياراتك

أحمد سلامــة يقول...

أميرة ويلز :

حمدالله عالسلامة
ايه ده البوست ده بتاع الناس المختفيين ولا ايه ؟
نورتيني يا اميرة الاميرات
اظهري وباني
:)

أحمد سلامــة يقول...

هيثم :

ينفع كده يا عم هيثم تلخبطني في مدونتك انت وعدنان
:)

ربنا يكرمك يا صاحب ياقرا تعليقي على عدنان وتعرف انك واحشني
انت وهو كمان والبورصة والقعدة الحلوة
:)
يا رب تكون بخير يا رب

أحمد سلامــة يقول...

دانا :

اشكرك على السؤال
الامتحانات اللعينة ليس اكثر
اعتبريه خير اذن او ما شابه :)

أحمد سلامــة يقول...

عازف الناي الحزين :

ايه يا عم كريم الغيبة دي كلها
فينك يا فنان
وحشتنا انت والاخ اياه
:)
اظهرو كده
نورت يا صديقي
والسلام امانة

أحمد سلامــة يقول...

م. الحسيني لزومي

جزاك الله خير على مجهودك
ربنا يجعل تعبك بفايدة
نورت مدونتي
ومرحبا بيك وبحملاتك الدعائية هنا دايما
وعجبتني قصيدة السجود الاخير في مدونتك جدا
دمت بخير

أحمد سلامــة يقول...

حاجات عيال :

ميرسي ليكي
تعليق يشرفني مديحه
:)
شكرا ليكي
نورتي مدونتي

أحمد سلامــة يقول...

R.R

ها انا ذا
عذرا مرة اخرى للتأخير

أحمد سلامــة يقول...

dew_bright

شكرا للزيارة
سعدت بها
تحيتي لك

mohamed hesham يقول...

روعة