أصل العـتب عـــــالشوف

زي أما اكون من صغري ضَلِّيت الطريق
لكن ومالقيت الا ضِـلك من الخلايق في الصحارى التيه
زي اما اكون إنسان سفيه
واترهـبِنـِت شياطيني من جوايا فجأة عن كـَـبر
واستـنـتجـِت مـ العتمه مصطلح النظر
واتعلمت منك حبيبتي - غير بحور الشعر وأنين الوتر
معنى الحـــياه
يـاه وألف يـاه
يـاه عاللي جوايا وساكنني من زمن
إحساس بـيتم مالوش قرار
إحساس بعتمة ليل ما يطلعلوش نهار
إحساس بمليون ابتسامة لم تصالحنى بقالها كام زمن
واللي عاشرته من قاموس الدنيا كـان معنى الشجن
لمَّـا نسيت مـ الضحك إيه معناه
يـاه عالحياه
لمَّـا تـلوِّن وشها مـالبحر حبه والمطر
لمَّـا تصالح مالبشر
كـل البشر
وامَّـا يكون الحزن إحساس مغتـرِب في الدنيا ، ايه معناه ؟؟!!
يـــاه عالحيــاه
لمَّـا يكون انتي ونورك والقمر
كل الحيــــــاه
حتى ولو لحظة
وكــــانت
وانتهت
************
ما قدرت أنكر إني شفتك يوم حبيبتي
مرة واحده في الحياة !! جايز
وجايز يوم رأيتك فـ المنام
يمكن قريتك يوم قصيدة في بحر شعر مالوش شبيه
ويجوز رأيتك في القراية وسط نشوة هلوسة
لـكنـي ضاع منى الديوان يوم واتنسى
مش قلتلك إنسان سفيه
إيه اللي جابك يوم حبيبتي للصحارى التيه ؟؟
من صغرى تايه في الحياه
والباقي من عمري وسنيني لو هتوهه لمنتهاه
لم كنت هـشعر بيه
العهد كان بيني وبين الدنيا أفضل في الصحارى للأبد
وان الـتمن
عمري فـ يوم ما اشعر بعتم الغيم على قلبي القـتيل
أو إني ساير في الحياه من غير دليل
إيه اللي جابك يوم حبيبتي للصحارى التيه ؟؟
وفـ عز عتم الليل
وبـإيـدك القناديل ؟؟
وبدال ما اشوف الدرب بيهم
وأوصل للحضَـر
شفتك حبيبتى
وانسرق مني اللي باقي مـ النظر
وعرفت إني
عــايش الدنيا ضرير
لــٰــكن ولا حاسس بفقدان البصر
************
لو كنتي يوم مـا نزلتي من كوكبك
جنب القمر ، ونجومه
والضي فـ الـــــسموات
ما كنت يوم حسيت بتـيه
ولا كنت حسيت الــغرق
في الضلمة من سـنوات
لكن مانيش بعتب عليكي حنانك المقصود
ولا كان فـ قصدي مـ الكلام اللوم
أصل العتب عالشوف - حبيبتي - أنه جاني في يوم
لاجل امـَّا يتحسَّر فـ عمري اللي باقيلي
من ضلام اتهتـَك بضـي من كوكبك
ويفوتني من تاني الضيا
وانـا مـرتعش مـرتبــك
لاجل أما أشق دروبـي في الضلام
وفـ عقلي منك صور ، أبدا ولا تتمحي
ولو تفوت الايام
ولو اتمحـى من ضــي عيني الشوف
والتيه طريق
أبدا ولا ينتهى ، لساه طويل ملفوف
وفـ طعم صخر الصحارى
وملمس الصبار لمَّـا تصافحة الإيدين
وفـ طعم دمعه مـ العينين
نازلـة بتجري
لاجل تلحق تجرح الخدين
وتسابق الكلمة اللي ناطقاها الشفايف
لما بتقولك : حبيبتي ( من سكات )
إنسان مانيش خايف
ولـٰــكن
حسنك الغالي أمرني بالسكات
ومن الجمال - دايما - أنـــا بارتجف
فضروري يركبني الخرَس
لمَّـا تقولي انك حبيبتي للأبد
واني هكونلك للأبد
وفـ عز نورك ترحلى من غير كلام
وافضل أسير ذكرى لنورك
والصحارى التيه
وحسنك
والضلام