تووت تووت تووت تووت
واقف عالقضبان محطوط
تووت تووت تووت تووت
قطر مرقع مــش مظــبوط
يمشي ويطلع حبة ويرجع
عــمال عالقضبان يتـــدلع
ولا ينطق غير كلمة تووت
***
تووت تووت تووت تووت
أما صحيح سواق هلفوت
***
قاعد فـي القطر وكـده عــادي
قعدت علي الكرسي اللي قصادي
حتة قمراية انما ايه
اللهـم صلي عـليــه
بس عـلى إديـن البنوته
كــان نايـم قـد الفتـفـوته
بابي محندق وصغــنتوت
ومغــمض زي الكـتــكوت
رايح طبعا في سابع نومة
ولا على باله انشالله نموت
***
تووت تووت تووت تووت
سـواق قطر أهبل مخبوط
***
عــالأمور أنا تـاني بصيت
لسه صغير ، طب ليه جيت
عــارف انـك كده مبسـوط
نايم ، هايـم فـي الملكـوت
بكره هتكبر ياحبيب مامتك
وهتـتمنى إن انـت تمـوت
أو لــو كـنت ولـد متفـائـل
هتفضل تفضل كده جاهـل
قاعـد قـايم عـايـش نـايـم
ومتنح في هدوء وسكوت
***
تووت تووت تووت تووت
صدعت الناس يا مسخوط
***
اه لــو تعـرف يـا صغـنون
كــام مليـون واحد مطحون
كــام إنسان بيـــن القضبان
دلـوقـتي وحــــالا بيـمــوت
كـام بابا وكـام ماما وعــمو
مع بعض وفي الحبس إتلموا
بيـن سور المعـتقـل إتـرموا
ولا تاني سمعـنالهم صوت
***
تووت تووت تووت تووت
سـواق مخك مش محطوط
***
مــعـلـــش النـوبــة يـا أمور
إتــحـمـل خـلـيـك شــطــور
صـحـيتك وقـلـقـت منــامـك
اعمل إيـه اصل انـا مكـبوت
وانـت علي صعـبت صـراحه
كــان نفسـي اقولـك بـالراحـة
ان الـعيـشه مـاهـيش مرتـاحه
وان القــطر ده أصـله تــابوت
يـالا يــا كتـكوت كمـل نـومـك
وبلاش تيـأس ده اليوم يومك
حــاول تصـبر وإوعـاك تكـبر
وانسى كلامي ده مش مظبوط
سيـبني أرجـع للسكـه أبـص
برد وضلـمه وعتمـه وهـس
مش باين في سكوت الخرس
واحــد تـانـي يقـولنا تـووت
***
تووت تووت تووت تووت
فكرك يوم مانتاش هاتموت
16 comments:
ياريت تتصرفولنا في كومنتات صوت وصورة علشان تشوفني وانا بسقفلك ع البوست الرائع ده
ايه الجمال ده وايه شحنه الهموم دي.....بصراحه اكتر من رائع
الفكرة جميله واستخدامك للقطر بالذات كبلاتوه للمشهد شئ رائع وكلماتك حلوة وخفيفة
يارب دايما متألق
جميل ورائع
دة اول انطباع ليه لما دخلت على البوست وقريته
انت عبقرى .. استمر
كلام جميل
كتبت فابدعت
تحياتى
قاقيص :
ربنا يخليك يا مي ومايحرمنيش من تعليقاتك الرقيقه دي
ياسمين :
نورتي المدونه يا ياسمين ، بس كبييييره قوي علي كلمة عبقري دي ، العباقرة موجودين في البوست بتاع عبقريان ، لو قريتيه هتعرفي اني بالنسبة ليهم ابقى مع الرأفة معاق زهنيا
ميرسي لزوقك
مستني زياراتك دايما
: تامر
انت أجمل يا تامر
علقت فأخجلت
شكرا ليك
بصراحه جامده موت واحلى حاجه انت كتبتها وعجبتني مع اني قريتلك كتير
بس مش عاجباني بصراحه مخك مش محطوط حاسس انها تلزيق كلام زي اغاني عمرو دياب كده
ahmed
والله يا أحمد كلامك كله جميل ، حتى رأيك في كلمة مخك مش محطوط عجبني قوي ودخل دماغي
بس مش لدرجة أغاني عمرو دياب يعني
انا ماقلتش ياريت انا أشوفك قصادي
يا ريت هواك ده كان حب عادي
ميرسي لزيارتك ، ماتختفيش كده ياعم
تووت توووت
بداية جميلة لزجل جميل
ياترى الطفل البرئ حيفضل برئ ولا حيتغير من كتر الطحن
أتمنى لأ
الغريب
ياااه يا غريب
فينك يا راجل
وحشتنا والله
يارب ماتغيب علينا كده تاني
ويارب كمان امنيتك تتحقق والبريء يفضل بريء
مع انه حلم صعب قوي يا غريب
تحياتي ليك ولمدونتك الممتعه دايما
جميل يا أحمد كلامك...و خفيف أوي...بس عقدت البيبي في عيشته ياراجل...و آل إيه...بلاش تيأس ده اليوم يومك...و بعدين نازل شتيمه في سواق القطر...هلفوت، أهبل مخبوط، مسخوط، و مخك مش محطوط...لكن مامة البيبي...قمراية إنما إيه...بس كلامك كله على بعضه جميل
معجبنيش بئه واقف ع القضبان محطوط، و مخك مش محطوط...بيتهيألي العيب في كلمة محطوط...أنا جربتها مضبوط و بلعتها الحمد لله...بالهنا و الشفا ليَ
قعدت علي الكرسي اللي قصادي
حتة قمراية انما ايه
اللهـم صلي عـليــه
-----------------
هيه هيه
توت توت
جامده موت
وبالذات الحته دي؟؟
أية دة
جاااااامدة انا أخدتها عندى على الجهاز
روعة روعة روعة روعة
بجد ممتازة جداا
بس أنت كنت قاسى قوى على سواق القطر
برافووووو
عسسسسسسل جدااااا والله انت جامد جدا
ومشاء الله عليك دماغغغغغغغغغغغ
كلها كلها حلوه
مفيش احلى من انك تشوف بيبي نايم في حضن مامته
وتحس انه مطمن ومبسوط
تحس ان الدنيا امان وبخير
لكن ترجع تبص حواليك تاني
تلاقي اللي بيسرق والي بيضرب ولفساد مالوش اخر ووشوش واقنعه وتزييف وتخريف
ابدعت وابهرتني بكل الكلام ده
انت موهبتك عبقرية فعلا
دخلت بلوجك من زمان مرة واحدة و قريت الموضوع دا و كان عاجبنى جدا .. جدا جدا ..
بس أيامها يا خسارة ما حاولتش أحفظ عنوان بلوجك ..لذلك لما فكرت ارجعله تانى ما عرفتش
و دلوقتى فرحت اوى لما لقيته تانى
عايز أشكرك تانى على ردك على بلوجى..
و عايز أحييك من كل قلبى على الموضوع الأكتر من رائع دا بجد
إرسال تعليق